మందుల కోసం రూ. 30 ఇవ్వమంటే తలాక్ చెప్పిన భర్త

ముస్లిం మహిళల వివాహ హక్కుల రక్షణ కోసం కేంద్ర ప్రభుత్వం ట్రిపుల్ తలాక్‌ను రద్దు చేస్తూ ఇటీవలే చట్టం చేసింది. అయినప్పటికీ దేశంలో రోజూ ఎక్కడో ఓ చోట చెప్పి, విడాకులు ఇస్తున్న ఘటనలు మాత్రం పునరావృతం అవుతూనే ఉన్నాయి. తాజాగా.. జ్వరంతో బాధపడుతున్న కూతురుకి మందులు కొనడం కోసం రూ. 30 అడిగిందని భార్యకు ట్రిపుల్ తలాక్ చెప్పి, ఇంటి నుంచి గెంటెశాడో భర్త. ఈ ఘటన రెండు రోజుల కిందట ఉత్తర ప్రదేశ్‌లో చోటు చేసుకుంది. వివారల్లోకి వెళితే.. హర్పూర్ జిల్లా పరిధిలో నివసించే ఓ ముస్లిం మహిళకు మూడేళ్ల క్రితం అదే ప్రాంతానికి చెందిన వ్యక్తితో వివాహం జరిగింది. ప్రస్తుతం ఆమె తన భర్త, పిల్లలు, అత్తమామలతో కలిసి నివసిస్తోంది. అయితే ఇటీవల ఆమె కూతురు తీవ్ర జ్వరంతో బాధపడుతుండగా మందులు కొనడానికి భర్తను రూ. 30 అడిగింది. కానీ, భర్త డబ్బులు ఇవ్వడానికి నిరాకరించి, తీవ్ర వాగ్వాదానికి దిగాడు. అనంతరం మూడుసార్లు తలాక్ చెప్పాడు. ‘నా కూతురుకి జ్వరం రావడంతో మందుల కోసం నా భర్తను రూ. 30 అడిగాను. డబ్బులు ఇవ్వకుండా నాతో గొడవకు పెట్టుకొని, మూడుసార్లు తలాక్ చెప్పి వెళ్లిపోయాడు. దీంతో కుటుంబ సభ్యులు నన్ను ఇంటి నుంచి గెంటేశారు. నా నుంచి పిల్లల్ని దూరం చేశారు’ అని బాధిత మహిళ వాపోయింది. ఈ విషయమై మహిళ నుంచి ఫిర్యాదు తీసుకొని, కేసు నమోదు చేశామని హర్పూర్ డీఎస్పీ రాజేశ్ సింగ్ తెలిపారు. ఈ ఘటనపై విచారణ జరిపి చట్టపరమైన చర్యలు తీసుకుంటామన్నారు. మూడుసార్లు తలాక్ చెప్పడం ద్వారా విడాకులు ఇవ్వడాన్ని నిషేధిస్తూ కేంద్ర ప్రభుత్వం ఇటీవలే ముస్లిం మహిళల వివాహ హక్కుల రక్షణ చట్టాన్ని రూపొందించిన విషయం తెలిసిందే. ఈ చట్టం ప్రకారం.. మూడుసార్లు తలాక్ చెప్పడాన్ని నేరంగా పరిగణిస్తారు. దీనికి మూడేళ్ల జైలు శిక్షతో పాటు జరిమానా కూడా విధిస్తారు.

from Telugu News Live | Today News in Telugu | తాజా తెలుగు వార్తలు https://ift.tt/2MeZYoG