లాక్‌డౌన్ విధించడం ఇష్టంలేదు.. కానీ, రోగుల సంఖ్య పెరుగుతుంటే వసతులెలా?

మహారాష్ట్రలో కరోనా వైరస్ అంతకంతకూ విస్తరిస్తోంది. శుక్రవారం (మార్చి 26) ఒక్క రోజు కేసుల సంఖ్య కొత్త గరిష్టానికి చేరుకుంది. ఏకంగా 36,902 పాజిటివ్ కేసులు నమోదయ్యాయి. దేశంలోకి కరోనా వైరస్ ప్రవేశించిన తర్వాత మహారాష్ట్రలో ఒక్క రోజులో నమోదైన అత్యధిక కేసులు ఇవే. భారత్‌లో ఏ రాష్ట్రంలోనూ ఈ స్థాయిలో కరోనా వ్యాప్తి లేదు. దీనికి తోడు కొత్త డబుల్ మ్యుటాంట్ స్ట్రెయిన్, పలు రకాల వైరస్ ఉత్పరివర్తనాలు మహారాష్ట్రను వణికిస్తున్నాయి. ఈ నేపథ్యంలో సీఎం ఉద్ధవ్ ఠాక్రే కీలక నిర్ణయం తీసుకున్నారు. కరోనా వైరస్‌ విజృంభణ దృష్ట్యా వ్యాప్తంగా రాత్రి పూట కర్ఫ్యూ విధిస్తున్నట్లు సీఎం ఉద్ధవ్‌ ఠాక్రే ప్రకటించారు. ఆదిరవారం (మార్చి 28) రాత్రి నుంచి నైట్ కర్ఫ్యూ అమల్లోకి వస్తుందని తెలిపారు. రాత్రి 8 గంటల నుంచి ఉదయం 7 గంటల వరకు మాల్స్‌ మూసి వేయాలని అధికారులను ఆదేశించారు. మరింత అప్రమత్తంగా ఉండాలని సూచించారు. రాష్ట్రంలో మరోసారి విధించడం తనకు ఇష్టంలేదని.. కానీ, కేసుల సంఖ్య పెరుగుతుండటంతో ఆస్పత్రుల్లో రోగులకు వసతులు, చికిత్స అందడం లేదని ఉద్ధవ్ ఆవేదన వ్యక్తం చేశారు. మహారాష్ట్రలో కరోనా పరిస్థితి, కట్టడి చర్యలపై ముఖ్యమంత్రి ఉద్ధవ్ ఠాక్రే శుక్రవారం ఉన్నత స్థాయి సమీక్ష నిర్వహించారు. ఈ సమావేశంలో డివిజనల్‌ కమిషనర్లు, జిల్లా కలెక్టర్లు, మున్సిపల్‌ కమిషనర్లు, ఎస్పీలతో పాటు వైద్యాధికారులు పాల్గొన్నారు. కరోనా రోగులకు అవసరమైన పడకలు, మందులను అందుబాటులో ఉంచాలని ఆదేశించారు. ప్రజలంతా కొవిడ్‌ నిబంధనలు పాటించేలా చర్యలు తీసుకోవాలని సూచించారు. గడిచిన 24 గంటల వ్యవధిలో మహారాష్ట్రలో 36,902 పాజిటివ్ కేసులతో మొత్తం కేసుల సంఖ్య 26,37,735కు ఎగబాకింది. కొవిడ్-19 బారినపడి మరో 112 మంది మరణించారు. శుక్రవారం మరో 17,019 మంది కరోనా నుంచి కోలుకొని డిశ్చార్జి అయ్యారు. రాష్ట్రంలో ప్రస్తుతం 2,82,451 యాక్టివ్‌ కేసులు ఉన్నాయి. పుణేలో అత్యధికంగా 52,340 యాక్టివ్‌ కేసులున్నాయి. నాగ్‌పూర్‌‌లో 38348, ముంబైలో 36404, థానేలో 27474, నాసిక్‌‌లో 20568, ఔరంగాబాద్‌‌లో 19063, నాందేడ్‌‌లో 12943 యాక్టివ్ కేసులున్నాయి. Must Read: ✦ ✦

from Telugu News Live | Today News in Telugu | తాజా తెలుగు వార్తలు https://ift.tt/3davq2j