Third Wave జనం ఒకే చోట చేరకుండా జాతీయ విధానం తీసుకురావాలి.. మోదీకి ఉద్ధవ్ సూచన

ప్రస్తుతం కరోనా వ్యాప్తి ఎక్కువగా ఉన్న మహారాష్ట్ర, కేరళ, ఆంధ్రప్రదేశ్, కర్ణాటక సహా ఆరు రాష్ట్రాల ముఖ్యమంత్రులతో ప్రధాని నరేంద్ర మోదీ శుక్రవారం వర్చువల్‌గా సమావేశమై చర్చించారు. ఈ సందర్భంగా మోదీకి మహారాష్ట్ర ముఖ్యమంత్రి కీలక విన్నపం చేశారు. కోవిడ్ వ్యాప్తిని నిరోధించేందుకు సామాజిక, రాజకీయ, మతపరమైన కార్యక్రమాల్లో జనం ఒకేచోట గమిగూడకుండా చూడాలని, దీనిపై జాతీయ విధానాన్ని తీసుకురావాలని కోరారు. కోవిడ్ మహమ్మారిపై ప్రభుత్వం పోరాటం సాగిస్తున్నప్పటికీ బహిరంగ ప్రదేశాల్లో జనం గుమిగూడకుండా అడ్డుకోవడం ఒక సవాల్ అవుతోందని ఠాక్రే అన్నారు. సామాజిక రాజకీయ, మతపరమైన కార్యక్రమాల్లో పెద్దఎత్తున్న పాల్గొనకుండా నిరోధించేందుకు ఒక జాతీయ విధానాన్ని తీసుకురావాల్సిన అవసరం ఉందని ఉద్ధవ్ నొక్కిచెప్పారు. మహారాష్ట్రలో రెండో దశ కరోనా వ్యాప్తిని నియంత్రించడానికి రాష్ట్ర ప్రభుత్వం తీసుకున్న చర్యలను ఈ సందర్భంగా ప్రధానికి వివరించారు. థర్డ్ వేవ్ వచ్చినట్లయితే ఎదుర్కొనేందుకు కూడా వ్యూహరచన చేస్తున్నామని తెలిపారు. తమిళనాడు, ఆంధ్రప్రదేశ్, కర్ణాటక, ఒడిశా, మహారాష్ట్ర, కేరళ ముఖ్యమంత్రులు ఈ సమావేశంలో పాల్గొన్నారు. వీడియో కాన్ఫరెన్స్‌లో కేంద్ర ఆరోగ్య, రక్షణ శాఖ మంత్రులు, ఉన్నతాధికారులు కూడా ఉన్నారు. కోవిడ్ నియంత్రణ, కట్టడి చర్యలు, టీకా పంపిణీ వేగవంతం చేయడం సహా రాష్ట్రాలకు ప్రధాని మోదీ పలు సూచనలు చేశారు. మూడో దశలో చిన్నారులకు ముప్పు పొంచి ఉందన్న నిపుణుల హెచ్చరికల నేపథ్యంలో ఆరోగ్య మౌలికసౌకర్యాలను సంసిద్ధం చేయాలని మోదీ సూచించారు. ప్రస్తుతం దేశంలోని 47 జిల్లాల్లో కోవిడ్ పాజిటివిటీ రేటు 47 శాతం కంటే ఎక్కువగా ఉందని, 73 జిల్లాల్లో రోజువారీ కేసులు 100 కంటే తక్కువగా నమోదయినట్టు కేంద్ర ఆరోగ్య శాఖ వెల్లడించింది. టీకాలు సమర్ధవంతంగా పనిచేస్తున్నా.. మాస్క్ తప్పనిసరిగా ధరించాలని పేర్కొంది. ఒక్క డోస్‌తో 82 శాతం, రెండు డోస్‌లు వేసుకుంటే 95 శాతం కోవిడ్ మరణం ముప్పు తగ్గుతుందని కేంద్ర ఆరోగ్య శాఖ ముఖ్య కార్యదర్శి లవ్ అగర్వాల్ తెలిపారు.

from Telugu News Live | Today News in Telugu | తాజా తెలుగు వార్తలు https://ift.tt/3BdlBvB