దక్షిణాఫ్రికాలో వెలుగుచూసిన వేరియంట్ ప్రపంచ మొత్తాన్ని మరోసారి భయం గుప్పిట్లోకి నెట్టేసింది. అత్యంత వేగంగా ఈ వేరియంట్ వ్యాప్తిచెందడంతో మరోసారి అనేక దేశాలు ఆంక్షల్లోకి జారుకున్నాయి. ఐరోపాలో ఒమిక్రాన్ ఉధృతి కొనసాగుతోంది. యూకే, ఫ్రాన్స్, స్పెయిన్ తదితర దేశాల్లో రికార్డుస్థాయిలో కొత్త కేసులు వెలుగుచూస్తున్నాయి. కరోనా దెబ్బకు యూకే విలవిలలాడుతోంది. ఒమిక్రాన్ వేరియంట్ యూకేలో విరుచుకుపడి విధ్వంసం సృష్టిస్తోంది. బూస్టర్ డోస్లు వేస్తున్నా రీఇన్ఫెక్షన్ ముప్పు తప్పడం లేదు. అయితే, భారీగా కేసులు నమోదవుతున్నా మరణాలు మాత్రం తక్కువగా ఉండటం శుభపరిణామం. దీంతో మొదటి వేవ్ సమయంలో 14 రోజులుగా ఉన్న క్వారంటైన్ కాలాన్ని వారం రోజులకు కుదించారు. ఒమిక్రాన్ వేరియంట్ కేసులు క్రమంగా తగ్గుముఖం పడుతుండటంతో క్వారంటైన్ సమయాన్ని వారం నుంచి 5 రోజులకు కుదిస్తూ నిర్ణయం తీసుకున్నారు. ఒకవేళ కోవిడ్ నిర్ధారణ పరీక్షల్లో రెండుసార్లు నెగెటివ్ వస్తే కేవలం ఐదు రోజులు మాత్రమే క్వారంటైన్లో ఉంటి సరిపోతుందని గతవారం యూకే ఆరోగ్య మంత్రి సాజిద్ జావీద్ వెల్లడించారు. కాగా, బ్రిటన్ ప్రధాని బోరిస్ జాన్సన్ మరో కీలక నిర్ణయం తీసుకోబోతున్నట్టు తెలుస్తోంది. కోవిడ్ ఎమర్జెన్సీ చట్టాలను పూర్తిగా రద్దు చేయాలనే యోచనలో బోరిస్ జాన్సన్ ఉన్నారని విశ్వసనీయ వర్గాలు పేర్కొంటున్నాయి. జరిమానాలు, చట్టపరమైన చర్యలు తీసుకోవడం వల్ల కరోనా కేసులు తగ్గుతాయని అనుకోవడం లేదని, ప్రత్యామ్నాయంగా ప్రణాళికలు సిద్దం చేస్తున్నారని విశ్లేషకులు అంచనా వేస్తున్నారు. రాబోయే వారాల్లో దీనిపై నిర్ణయం వెలువడుతుందని భావిస్తున్నారు. కరోనా ఆంక్షలపై ఇప్పటికే బ్రిటన్లో ప్రజల నుంచి పెద్ద ఎత్తున వ్యతిరేకత వస్తోంది.
from Latest News in Telugu | Telugu Breaking News | బ్రేకింగ్ న్యూస్ Telugu | Samayam Telugu https://ift.tt/34XrZeZ
0 Comments