అవసరమైతే రాజకీయాల నుంచి తప్పుకుంటా.. కానీ, ఆ పార్టీతో పొత్తు ప్రసక్తే లేదు: మాయావతి శపథం

భవిష్యత్లులో ఉత్తర్‌ ప్రదేశ్‌లో జరిగే ఎమ్మెల్సీ ఎన్నికల్లో సమాజ్‌వాదీ పార్టీ అభ్యర్థులను ఓడించేందుకు తాను సహా ఏ పార్టీతోనైనా పొత్తులకు సిద్ధమేనని బీఎస్పీ అధినేత్రి ఇటీవల సంచలన ప్రకటన చేసిన విషయం తెలిసిందే. దీంతో, బీజేపీతో మాయావతి జట్టుకడతారనే ప్రచారం ఊపుందుకుంది. తన వ్యాఖ్యలపై జరుగుతోన్న ప్రచారంపై తాజాగా మాయావతి స్పందించారు. ఎట్టి పరిస్థితుల్లోనూ బీజేపీతో పొత్తు ప్రసక్తే ఉండబోదని స్పష్టం చేశారు. బీజేపీ అనేది కుల, మత, పెట్టుబడిదారీ సిద్ధాంతాలు కలిగిన పార్టీ అని దుయ్యబట్టిన ఆమె.. తమది సర్వజన హితం కోరే పార్టీ అని అన్నారు. అవసరమైతే రాజకీయాల నుంచి తప్పుకుంటాను కానీ బీజేపీతో పొత్తు పెట్టుకునే పరిస్థితే లేదని తెగేసి చెప్పారు. మతతత్వ పార్టీలపై తన పోరాటం కొనసాగుతూనే ఉంటుందని ఉద్ఘాటించారు. తాను ఎవరి ముందు మోకరిల్లే ప్రసక్తే లేదని పునరుద్ఘాటించారు. భవిష్యత్లులో జరిగే ఎన్నికల్లో సమాజ్ వాదీ పార్టీ అభ్యర్థులను ఓడించేందుకు తాను బీజేపీకి ఓటు వేసేందుకు కూడా సిద్ధమేనని గురువారం బీఎస్పీ అధినేత్రి మాయావతి ప్రకటించారు. గత ఎన్నికల్లో ఎస్పీ-బీఎస్పీ కూటమి లబ్ధి కోసం సమాజ్‌వాదీ పార్టీపై 1995లో పెట్టిన కేసుని ఉపసంహరించుకుని పెద్ద తప్పు చేశానని మాయావతి ఆరోపించారు. సమాజ్ వాదీ పార్టీ అభ్యర్థిని ఓడించేందుకు ఏ అభ్యర్థికైనా బీఎస్పీ ఎమ్మెల్యేల ఓటు తప్పనిసరిగా ఉంటుందని తాను మాటిస్తున్నానని మయావతి తెలిపారు. నవంబర్-9న ఉత్తరప్రదేశ్ లోని 10రాజ్యసభ స్థానాలకు ఎన్నికలు జరగనున్న సమయంలో మాయావతి నోట బీజేపీకి మద్దతు అనే మాట ఇప్పుడు హాట్ టాపిక్ గా మారింది. దశాబ్దాలు విబేధాలను పక్కనబెట్టి సార్వత్రిక ఎన్నికల్లో బీజేపీ ఓటమే లక్ష్యంగా మాయావతి, అఖిలేష్ యాదవ్ మహాకూటమిగా కలిసి పోటీచేసిన విషయం తెలిసిందే. అప్పటివరకు ప్రధాన ప్రత్యర్థులుగా ఒకరిపై ఒకరు విమర్శలు గుప్పించుకున్న వీరిద్దరూ చేతులు కలపడంతో ఇక వీరి కూటమికి తిరుగే ఉండదని చాలామంది భావించారు. అయితే, వీరి అంచనాలను తలకిందులు చేస్తూ బీజేపీకే యూపీ ఓటర్లు మెజార్టీ సీట్లు కట్టబెట్టారు.

from Telugu News Live | Today News in Telugu | తాజా తెలుగు వార్తలు https://ift.tt/323kcYP