అన్ని వేరియంట్లను అడ్డుకునే స్ప్రే టీకా.. అభివృద్ధి చేసిన కెనడా

రెండేళ్లుగా ప్రపంచాన్ని వణికిస్తున్న కోవిడ్-19పై పోరాటంలో భాగంగా పలు ఔషధాలు, వ్యాక్సిన్లు అందుబాటులోకి వచ్చాయి. ఈ క్రమంలో టీకా పరిశోధనల్లో శాస్త్రవేత్తలు మరో మైలురాయిను చేరుకున్నారు. పీల్చుకోవడానికి అనువైన రీతిలో స్ప్రే వ్యాక్సిన్‌ను కెనడాలోని మెక్‌మాస్టర్‌ విశ్వవిద్యాలయానికి చెందిన పరిశోధకులు అభివృద్ధి చేశారు. ఈ స్ప్రే టీకా కొవిడ్‌-19 నుంచి దీర్ఘకాలం, సమర్థవంతమైన రక్షణ కల్పిస్తుందని పరిశోధకులు వెల్లడించారు. ఇంజెక్షన్‌ రూపంలో కంటే స్ప్రే టీకా వల్ల శ్వాసవ్యవస్థకు నేరుగా రోగనిరోధక ప్రయోజనాలు అందుతాయని ప్రాథమికంగా నిర్ధారించారు. త్వరలోనే ఈ టీకాపై క్లినికల్‌ ట్రయల్స్ చేపట్టనున్నారు. ‘‘ప్రస్తుతం అందుబాటులో ఉన్న కొవిడ్‌ వ్యాక్సిన్లు... స్పైక్‌ ప్రొటీన్‌ను లక్ష్యంగా చేసుకుని రూపొందించినవి.. వేరియంట్లను బట్టి వాటిని ఎప్పటికప్పుడు నవీకరించుకోవాల్సి ఉంటుంది.. కానీ, మేము శక్తిమంతమైన క్షయ వ్యాక్సిన్‌ నమూనాల ఆధారంగా స్ప్రే టీకాను తయారు చేశాం.. ఏ వేరియంట్‌నైనా ఇది సమర్థంగా ఎదుర్కొంటుంది.. ఇంజెక్షన్‌ రూపంలోని వ్యాక్సిన్లు అందించలేని ప్రయోజనాలు ఇందులో ఉన్నాయి. ముఖ్యంగా ‘ట్రైన్డ్‌ ఇన్నేట్‌ ఇమ్యూనిటీ’ విధానంలో... ఊపిరితిత్తులు, శ్వాసవ్యవస్థకు కరోనా, ఇతర సూక్ష్మక్రిముల నుంచి రక్షణ కల్పిస్తుంది.. భవిష్యత్తులో తలెత్తే మహమ్మారులనూ దీని ద్వారా అడ్డుకునే అవకాశముంది.. పైగా పీల్చుకునే టీకాను చాలా సులభంగా తీసుకోవచ్చు.. ఎక్కడికైనా ఇబ్బంది లేకుండా చేరవేయవచ్చు’’ అని పరిశోధనకర్త మాథ్యూ మిల్లర్‌ వివరించారు. మేము మూడు ప్రోటీన్‌లను కలిగి ఉన్న కోవిడ్ వ్యాక్సిన్‌ను అభివృద్ధి చేశామని మెక్‌మాస్టర్ వర్సిటీ మైక్రోబయాలజిస్ట్ డాక్టర్ ఫినో స్మాయిల్ అన్నారు. ఇంజెక్షన్ ద్వారా వ్యాక్సిన్ ఇవ్వడానికి బదులు చాలా సౌకర్యవంతంగా ఉండే చిన్న జెట్ నెబ్యులైజర్‌ని ఉపయోగించి నేరుగా ఊపిరితిత్తులలోకి ఏరోసోల్ ఇన్‌హేలేషన్ ద్వారా ఇవ్వడం ఇది బహుశా అత్యంత ఉత్తేజకరమైన అంశం అన్నారు. మొదటి, రెండో దశ క్లినికల్ ట్రయల్స్‌కు కెనడా ప్రభుత్వం ఆనుమతించినట్టు పేర్కొన్నారు.

from Latest News in Telugu | Telugu Breaking News | బ్రేకింగ్ న్యూస్ Telugu | Samayam Telugu https://ift.tt/7SuXWTi