ప్రకాశం: ప్రియుడ్ని నిర్బంధించిన యువతిపై గ్యాంగ్ రేప్

ప్రేమజంటను బంధించిన యువతిపై సామూహిక అత్యాచారానికి పాల్పడిన ఘటన ప్రకాశం జిల్లాలో చోటుచేసుకుంది. శుక్రవారం రాత్రి కారంచేడులో జరిగిన ఈ ఘటన యువతి ఫిర్యాదుతో వెలుగులోకి వచ్చింది. పోలీసులు తెలిపిన వివరాల ప్రకారం.. చీరాలలోని విఠల్‌నగర్‌కు చెందిన బాధిత మహిళ (25)కు మూడేళ్ల కిందట వివాహమైంది. అయితే, అతడితో గొడవలు రావడంతో భర్త నుంచి విడాకులు తీసుకుని తల్లిదండ్రుల వద్ద ఉంటోంది. తల్లిదండ్రులకు భారం కాకూడదనే ఉద్దేశంతో జీవనోపాధి కోసం స్థానికంగా ఓ షాపులో పనిచేస్తుంది. ఈ క్రమంలో అదే గ్రామానికి చెందిన ఓ యువకుడితో ఆమెకు పరిచయం ఏర్పడింది. ఈ పరిచయం కాస్తా ప్రేమకు దారితీయడంతో ఇద్దరూ సన్నిహితంగా ఉంటున్నారు. ఈ జంట శుక్రవారం రాత్రి 7 గంటల ప్రాంతంలో బైక్‌పై షికారుకు వెళ్లారు. కారంచేడు వంతెన వద్ద బైక్ నిలిపి వీరిద్దరూ ఏకాంతంగా ఉన్న సమయంలో ముగ్గురు యువకులు అక్కడకు వచ్చారు. ఇద్దరినీ నిర్బంధించి వారి మొబైల్, నగదు లాక్కున్న తర్వాత యువతిపై సామూహిక అత్యాచారానికి పాల్పడ్డారు. యువతిని పక్కకు లాక్కెళ్లి ఇద్దరు యువకులు ఆమెపై అత్యాచారం చేశారు. అనంతరం అక్కడ నుంచి పరారయ్యారు. బాధితులు అతికష్టంమీద ఇంటికి చేరుకున్నారు. ఈ ఘటనపై బాధితురాలు శనివారం ఉదయం కారంచేడు పోలీసులకు ఫిర్యాదు చేసింది. ఆమె ఫిర్యాదు ఆధారంగా కేసు నమోదుచేసిన పోలీసులు దర్యాప్తు చేపట్టారు. ఈ ఘటనపై కారంచేడు ఎస్సై నరసింహారావు మాట్లాడుతూ.. యువతి ఫిర్యాదు ఆధారంగా కేసు నమోదుచేశామన్నారు. నిందితులను పట్టుకునేందుకు ముగ్గురు ఎస్సైల ఆధ్వర్యంలో ప్రత్యేక బృందాలు ఏర్పాటు చేసినట్టు తెలిపారు. నిందితులను త్వరలోనే పట్టుకుంటామని స్పష్టం చేశారు.

from Telugu News Live | Today News in Telugu | తాజా తెలుగు వార్తలు https://ift.tt/2XVqSrD