హిజాబ్‌కు అనుమతి.. యూనిఫామ్ రద్దుచేస్తూ మైసూర్ కాలేజ్ కీలక నిర్ణయం

కర్ణాటకలో హిజాబ్ వివాదంపై హైకోర్టు మధ్యంతర ఉత్తర్వులను వెలువరించిన విషయం తెలిసిందే. తుది నిర్ణయం వెలువరించే వరకూ ఎటువంటి మతపరమైన వస్త్రాలను ధరించి కళాశాలలకు రావొద్దని, విద్యా సంస్థలు నిర్దేశించిన డ్రస్ కోడ్‌ను అనుసరించాలని సూచించింది. అయితే, ఈ ఉత్తర్వులను ఉల్లంఘిస్తూ హిజాబ్, కేసరీ శాలువాలతో వస్తున్న పలువురు విద్యార్థులను అధ్యాపకులు అడ్డుకుంటున్నారు. తుముకూరులో హైకోర్టు ఉత్తర్వులను ధిక్కరించారని 20 మంది విద్యార్థులపై పోలీసులు ఎఫ్ఐఆర్ నమోదుచేశారు. కాగా, మైసూరులో ఓ ప్రముఖ ప్రయివేట్ విద్యా సంస్థ డ్రస్ కోడ్ నిబంధనలను శుక్రవారం రద్దు చేసింది. హిజాబ్ ధరించిన విద్యార్థినిలను తరగతి గదిలోకి అనుమతించింది. కర్ణాటకలో మొదలైన తర్వాత యూనిఫామ్‌ను రద్దుచేసిన మొదటి కళాశాల ఇదే. మైసూరు డీడీపీయూ డీకే శ్రీనివాసమూర్తి మాట్లాడుతూ.. నలుగురు విద్యార్థినులు హిజాబ్ లేకుండా తరగతులకు హాజరుకావడానికి నిరాకరించి నిరసన తెలిపారని అన్నారు. ‘‘నిరసన తెలిపిన విద్యార్థినులకు కొన్ని సంస్థలు మద్దతునిచ్చాయి. దీంతో శుక్రవారం కాలేజీకి వెళ్లి అందరితో చర్చించాం... మరోవైపు, విద్యార్థులను తరగతులకు అనుమతించేందుకు యూనిఫాం నిబంధలనను రద్దు చేస్తున్నట్లు కళాశాల ప్రకటించింది’’ అని పేర్కొన్నారు. మధ్యంతర ఉత్తర్వులను ఏవరైనా ఉల్లంఘిస్తే ఉపేక్షించబోమని, వారిపై తక్షణ చర్యలు తీసుకోవాలని పోలీసులకు హోం మంత్రి అరగ జ్ఞానేంద్ర ఆదేశాలు జారీచేశారు. ఈ నేపథ్యంలో తుముకూరులోని ఎంప్రెస్ కాలేజీ ప్రిన్సిపాల్ పోలీసులకు ఫిర్యాదు చేయగా.. 20 మందిపై కేసు నమోదుచేశారు. మడికెరిలో కొందరు విద్యార్థినులు హిజాబ్‌ను తొలగించేందుకు ససేమిరా అనడంతో స్థానిక జూనియర్‌ కళాశాల ప్రిన్సిపల్‌ ఒక్కసారిగా ఉగ్రరూపం దాల్చారు. కోర్టు ఆదేశాల్ని పాటించేందుకు తమకు పూర్తి హక్కు ఉందన్నారు. హిజాబ్‌ను తొలగించని పక్షంలో కళాశాల లోనికి అనుమతించే ప్రసక్తే లేదని స్పష్టం చేశారు. ఇళ్లకు వెళ్లాలని విద్యార్థినులను ఆదేశించారు. లేని పక్షంలో అరెస్టు చేయాలని పోలీసులను కోరారు.

from Latest News in Telugu | Telugu Breaking News | బ్రేకింగ్ న్యూస్ Telugu | Samayam Telugu https://ift.tt/YjmlynK