ప్రధాని మంత్రి సవతి కుమారుడు కారులో అక్రమంగా మద్యం తీసుకొస్తూ అడ్డంగా దొరికిపోయాడు. అతడి వాహనంలో మద్యం బాటిళ్లను గుర్తించిన పోలీసులు అదుపులోకి తీసుకున్నారు. ఇమ్రాన్ ప్రస్తుత భార్య బుశ్రా బిబూ కుమారుడైన ముసా మనేకా, అతడి ఇద్దరి స్నేహితులు కారులో వెళ్తుండగా పోలీసులు అనుమానించి తనిఖీలు చేశారు. లహోర్‌లోని గడాఫీ స్టేడియం సమీపంలో సోమవారం చేపట్టిన తనిఖీల్లో మద్యం బాటిళ్లు లభించడంతో అరెస్ట్ చేసినట్టు పోలీసులు తెలిపారు. అయితే, ఉన్నతాధికారులు ఆదేశాలతోనే వారిని కొద్ది గంటల్లోనే వదిలిపెట్టామని పేర్కొన్నారు. ‘‘ఉన్నతాధికారుల ఆదేశాలతో అరెస్ట్ చేసిన రోజునే ప్రధాని భార్య బుశ్రా బిబూ కుమారుడు ముసా మనేకా సహా ముగ్గురు యువకులను వదిలిపెట్టాం.. అనుమానితుల కుటుంబాల నుంచి వ్యక్తిగత పూచికత్తు వంటి న్యాయపరమైన ప్రక్రియ తర్వాత విడుదల చేశాం’’ అని ఓ పోలీస్ అధికారి తెలిపారు. తనిఖీల సమయంలో కారులో మద్యం సీసాలు స్వాధీనం చేసుకోగా.. ముసా పోలీసులను బెదిరించాడని ఆయన పేర్కొన్నారు. తాను పాక్ ప్రథమ మహిళ కుమారుడ్ని అని, అరెస్ట్ చేస్తే తీవ్ర పరిణామాలను ఎదుర్కోవాల్సి ఉంటుందని బెదిరించాడు. అయితే, ఈ బెదిరింపులకు భయపడని పోలీసులు అతడిపై కేసు నమోదుచేసి, అదుపులోకి తీసుకుని పోలీస్ స్టేషన్‌కు తరలించారు. చివరకు ఉన్నతాధికారులు పంజాబ్ పోలీస్ చీఫ్‌కు ఫోన్ చేయడంతో ఎటువంటి న్యాయపరమైన చర్యలు లేకుండానే కొద్ది గంటల తర్వాత కస్టడీ నుంచి వదిలిపెట్టారని ఓ అధికారి అన్నారు. పాకిస్థాన్‌లో మద్యం సేవించడం, అమ్మడం చట్టరీత్యా నేరం. మద్యపాన నిషేధం కొనసాగుతుండటంతో చట్టం ప్రకారం ప్రధాని సవతి కొడుకును పోలీసులు అరెస్ట్ చేశారు. అతడి బెదిరింపులకు ఏమాత్రం లొంగిపోకుండా కేసు నమోదుచేసి, కొద్ది గంటలు స్టేషన్‌లో ఉంచారు. చివరకు ఉన్నతస్థాయి నుంచి ఫోన్ రావడంతో వదిలిపెట్టారు. కాగా, ఇమ్రాన్ ఖాన్, ఆయన భార్య బుశ్రా బిబూ మధ్య విబేధాలు తలెత్తాయని సోషల్ మీడియాలో గతవారం విస్తృత ప్రచారం జరిగింది. అయితే, ఈ ప్రచారాన్ని ఆమె సన్నిహితులు కొట్టిపారేశారు. ఇదంతా తప్పుడు ప్రచారమని, బనీ గలా నివాసంలో ప్రధానితో ఆమె సంతోషంగా ఉందని బుశ్రా స్నేహితురాలు తెలిపింది. సోషల్ మీడియాలో ఇమ్రాన్, ఆయన భార్య, ఆర్మీపై తప్పుడు ప్రచారం చేస్తున్న ఐదుగుర్ని పోలీసులు ఇటీవలే అరెస్ట్ చేశారు.
from Latest News in Telugu | Telugu Breaking News | బ్రేకింగ్ న్యూస్ Telugu | Samayam Telugu https://ift.tt/dIHRzrM
No comments:
Post a Comment