లిపులేఖ్, కాలాపానీ, లింపియాధురా ప్రాంతాలను తమ భూభాగాలుగా పేర్కొంటూ నేపాల్ ఇటీవల తీసుకొచ్చిన వివాదాస్పద మ్యాప్నకు ఆ దే పార్లమెంట్ ఆమోదం తెలిపింది. దీనికి సంబంధించిన రాజ్యాంగ సవరణ బిల్లును దిగువ సభ శనివారం ఏకగ్రీవంగా ఆమోదించింది. ఈ బిల్లుకు మూడింట రెండొంతుల మెజార్టీ లభించింది. మొత్తం 275 మంది సభ్యులున్న దిగువ సభలో 258 మంది ఈ బిల్లుకు అనుకూలంగా ఓటువేశారు. ఏ ఒక్క సభ్యుడూ దీనిని వ్యతిరేకించకపోవడం గమనార్హం. నేపాల్ ప్రతిపక్ష పార్టీలు నేపాలీ కాంగ్రెస్ (ఎన్సీ), రాష్ట్రీయ జనతాపార్టీ నేపాల్ (ఆర్జేపీ-ఎన్), రాష్ట్రీయ ప్రజాతంత్ర పార్టీ (ఆర్పీపీ)లు కూడా ఈ బిల్లుకు పూర్తి మద్దతు తెలిపాయి. రాజ్యాంగంలోని షెడ్యూల్ 3ను సవరించేందుకు ఈ బిల్లును అధికార నేపాల్ కమ్యూనిస్టు పార్టీ ప్రవేశపెట్టింది. కొత్త మ్యాప్ బిల్లును ప్రవేశపెట్టడానికి మార్గం సుగమం చేసే ప్రతిపాదనను పార్లమెంటు ఏకగ్రీవంగా ఆమోదించింది. దీంతో ఈ సవరణ బిల్లును జాతీయ అసెంబ్లీకి పంపనుండగా.. దీనిపై సవరణలకు 72 గంటల సమయం ఉంటుంది. జాతీయ అసెంబ్లీలో అధికార పార్టీకి మూడింట రెండొంతుల మెజార్టీ ఉన్నందున బిల్లు ఆమోదం లాంఛనమే. జాతీయ అసెంబ్లీ ఆమోదం తర్వాత బిల్లు అధ్యక్షుడి ఆమోదం కోసం పంపుతారు. అక్కడ కూడా ఆమోదం పొందితే దీనిని రాజ్యాంగంలో పొందుపరుస్తారు. ఉత్తరాఖండ్లోని ధార్చులాతో లిపులేఖ్ కనుమను అనుసంధానించే 80 కిలోమీటర్ల పొడవైన వ్యూహాత్మక రహదారిని భారత్ ప్రారంభించగా.. దీనిని నేపాల్ తీవ్రంగా వ్యతిరేకించింది. ఈ రహదారి పూర్తిగా తమ భూభాగంలోనే ఉందన్న నేపాల్ వాదనను భారత్ తిరస్కరించింది. ఈ నేపథ్యంలో లిపులేఖ్, కాలాపానీ, లింపియాధురా ప్రాంతాలను తమ భూభాగాలుగా చూపుతూ కొత్త మ్యాప్ను నేపాల్ రూపొందించింది. చరిత్రను, పాత రికార్డులను పరిశీలిస్తే ఈ ప్రాంతాలు భారత్లోనే ఉన్నాయని నేపాల్తో ఎటువంటి సంబంధాలు లేవని తెలుస్తోంది. కాగా, భారత్తో సరిహద్దు వివాదం చర్చల ద్వారా పరిష్కరించుకుంటామని ప్రకటించిన నేపాల్ ప్రధాని.. ఇదే సమయంలో విపక్షాన్ని దారికి తెచ్చుకొని కొత్త మ్యాప్ ఆమోదానికి పావులు కదిపారు. రాజ్యాంగ సవరణ తలపెట్టిన కేపీ ఓలీ ప్రభుత్వం.. పార్లమెంట్ దిగువ సభలో మెజార్టీ లేకపోయినా ముందుకెళ్లింది. విపక్షాలను దారికి తెచ్చుకుని చివరకు బిల్లును ఆమోదింపజేసుకుంది.
from Telugu News Live | Today News in Telugu | తాజా తెలుగు వార్తలు https://ift.tt/2ABEIVR
0 Comments