ఐటీ మార్గదర్శకాలపై పెదవి విరిచిన సుప్రీం.. కఠినమైన చట్టం తేవాలని సూచన!

సోషల్ మీడియా, ఓటీటీ ప్లాట్‌ఫామ్‌‌ల దుర్వినియోగాన్ని నియంత్రించేందుకు కేంద్రం ఇటీవల తీసుకొచ్చిన నిబంధనలపై సర్వోన్నత న్యాయస్ధానం పెదవి విరిచింది. సోషల్ మీడియా, ఓటీటీ వేదికలపై ఈ నిబంధనలు అంతగా ప్రభావం చూపవని శుక్రవారం వ్యాఖ్యానించింది. వీటి స్థానంలో కఠినమైన నియమ నిబంధనలను రూపొందించాలని కేంద్రాన్ని జస్టిస్ అశోక్ భూషన్ ధర్మాసనం ఆదేశించింది. సమస్యను నివారించడానికి వీటికి సామర్థ్యం లేదని, కేవలం మార్గదర్శకాల రూపంలోనే ఉన్నాయని వ్యాఖ్యానించింది. నిబంధనలను పాటించనందుకు ప్రాసిక్యూషన్‌ చేసే అధికారం ఉండాలని కోర్టు పేర్కొంది. సోషల్ మీడియా, ఓటీటీ ప్లాట్‌ఫామ్‌ల నియంత్రణకు చట్టాన్ని తీసుకొచ్చే అంశాలను పరిశీలించాలని సొలిసిటర్ జనరల్ తుషార్ మెహతాకు ధర్మాసనం సూచించింది. కోర్టు సూచనలతో ఏకీభవించిన సొలిసిటర్ జనరల్.. ప్రభుత్వం కఠినమైన నిబంధనలను రూపొందించి, అమలు చేయడానికి ముందు కోర్టుకు ముసాయిదాను అందజేస్తుందని అన్నారు. కాగా, తాండవ్ వెబ్‌ సిరీస్ వ్యవహారంలో అమెజాన్ ప్రైమ్ ఇండియా ఎగ్జిక్యూటివ్‌ అపర్ణ పురోహిత్ ముందస్తు బెయిల్‌ను కూడా న్యాయస్థానం మంజూరు చేసింది. ఈ కేసులో అలహాబాద్ హైకోర్టు ముందస్తు బెయిల్‌కు నిరాకరించడంతో అపర్ణ పురోహిత్ సుప్రీంకోర్టును ఆశ్రయించిన విషయం తెలిసిందే. ఈ కేసులో గురువారం నాటి విచారణ సందర్భంగా ఓటీటీల్లో పోర్నోగ్రఫీలను కూడా ప్రసారం చేస్తున్నారని, వీటిని కట్టడి చేయాల్సిన అవసరం ఉందని సుప్రీంకోర్టు వ్యాఖ్యానించింది. సోషల్ మీడియా, ఆన్‌లైన్ స్ట్రీమింగ్ వేదికలను నియంత్రించే కొత్త మార్గదర్శకాలను రూపొందించాలని కేంద్రానికి సూచించింది.

from Telugu News Live | Today News in Telugu | తాజా తెలుగు వార్తలు https://ift.tt/3c2ZagT