చరిత్ర పాఠంపై ఆధారం చెప్పలేకపోయిన NCERT.. షాకిచ్చిన కార్యకర్త

నేషనల్ కౌన్సిల్ ఫర్ ఎడ్యుకేషన్ రీసెర్చ్ అండ్ ట్రైనింగ్ () సంస్థకు ఓ స్వచ్ఛంద కార్యకర్త లీగల్ నోటీసు పంపించడం చర్చనీయాంశంగా మారింది. సీబీఎస్‌ఈ సిలబస్‌లో భాగంగా 12వ తరగతి విద్యార్థులకు బోధిస్తు్న్న చరిత్ర పుస్తకంలో సవరణలు చేయాలని సూచించారు. విద్యార్థులకు అబద్ధపు చరిత్ర చెప్తున్నారంటూ ఆయన ఆగ్రహం వ్యక్తం చేశారు. ఇంతకీ ఏం జరిగిందంటే.. CBSE 12వ తరగతి చరిత్ర పాఠ్య పుస్తకంలోని ఓ పాఠంలో ‘మొగల్ చక్రవర్తి ఔరంగజేబ్ పాలనా కాలంలో హిందూ ఆలయాలను పునర్నిర్మించడానికి ప్రత్యేక గ్రాంట్లను విడుదల చేశారు’ అని ఉంది. రాజస్థాన్‌లోని భరత్‌పూర్‌కు చెందిన సామాజిక కార్యకర్త తాపిందర్ సింగ్.. అందుకు ఆధారం ఏంటో చెప్పాలని సమాచార హక్కు చట్టం ద్వారా ఎన్‌సీఈఆర్‌టీని అడిగారు. అయితే.. స్వయం ప్రతిపత్తి గల ఈ ప్రభుత్వ రంగ సంస్థ ఆ ఆధారాన్ని చూపడంలో విఫలమైంది. ఈ నేపథ్యంలో సామాజిక కార్యకర్త తాపిందర్ సింగ్.. ఎన్‌సీఈఆర్‌టీకి లీగల్ నోటీస్ పంపించారు. వెంటనే సదరు చరిత్ర పాఠ్యాంశంలో తగిన మార్పులు చేయాలని కోరారు. ‘ దేశంలోని సీబీఎస్‌ఈ స్కూళ్లలో విద్యార్థులకు తప్పుడు చరిత్రను బోధిస్తోంది. కేవలం విద్యార్థులే కాదు, సివిల్స్ సహా వివిధ పోటీ పరీక్షలకు సన్నద్ధమయ్యే వారు ఈ పుస్తకాలనే చదువుతున్నారు’ అని తాపిందర్ సింగ్ ఆవేదన వ్యక్తం చేశారు. జనవరిలో తాపిందర్ సింగ్ ఆర్టీఐ యాక్ట్ ద్వారా ఎన్‌సీఈఆర్‌టీని వివరణ కోరిన సమయంలో ఈ అంశం వెలుగులోకి వచ్చింది. తాపిందర్ సింగ్ ప్రశ్నకు NCERT బదులిస్తూ.. ‘ఆ అంశాన్ని రుజువు చేయడానికి మా డిపార్ట్‌మెంట్ వద్ద ఎలాంటి ఆధారాలు లేవు’ అని వివరణ ఇచ్చింది. ‘అన్ని రకాల ప్రార్థనా స్థలాల మరమ్మతులకు, నిర్వహణకు మొగల్ రాజులు ప్రత్యేక నిధులు ఇచ్చారు. యుద్ధాల సమయంలో దేశంలో అనేక ఆలయాలను ధ్వంసం చేశారు. కానీ, తదనంతర కాలంలో ఆ ఆలయాల పునర్నిర్మాణానికి ప్రత్యేక నిధులు కేటాయించారు. ముఖ్యంగా షాజహాన్, ఔరంగజేబ్ కాలంలో ఎక్కువగా నిధులు మంజూరయ్యాయి. ఏదేమైనా ఆ తర్వాతి కాలంలో ముస్లిమేతరులపై జిజియా పన్నును తిరిగి విధించారు’ అని సదరు చరిత్ర పాఠ్యాంశంలో ఉంది. రాజస్థాన్ కేడర్ ఐఏఎస్ ఆఫీసర్ సంజయ్ దీక్షిత్ కూడా గతంలో ఎన్‌సీఈఆర్‌టీ పాఠ్యాంశాలపై ఇదేవిధమైన అభిప్రాయాన్ని వ్యక్తం చేశారు. చాలా పాఠ్య పుస్తకాల్లో తప్పులు ఉన్నాయని ఆయన అభిప్రాయపడ్డారు. ‘ఎన్‌సీఈఆర్‌టీ చరిత్ర పాఠ్య పుస్తకాలన్నింటినీ జేఎన్‌యూ వర్సిటీ హిస్టరీ డిపార్ట్‌మెంట్ రూపొందిస్తోంది. వీటిపై సరైన పర్యవేక్షణ ఉండాలి’ అని ఆయన పేర్కొన్నారు.

from Telugu News Live | Today News in Telugu | తాజా తెలుగు వార్తలు https://ift.tt/30f9Kfa