రూ.100కే రూ.2 కోట్ల విలువైన ఇల్లు.. ఓ మంచి పనికోసం అమ్మకానికి పెట్టిన జంట

రెండు కోట్ల విలువచేసే ఇంటిని కేవ‌లం రూ.100కే అమ్మకం పెట్టింది ఓ కుటుంబం. రూ.100లకు కిలో టమోటాలు కూడా రావడం లేదు.. అలాంటిది రూ.2 కోట్ల ఖరీదైన ఇంటిని ఎలా ఇచ్చేస్తున్నారు. వినడానికి చాలా విచిత్రంగా ఉన్నా ఇది నిజమే. అయితే, దీని వెనుక ఓ మంచి ఆశయం ఉంది. బ్రిటన్‌లోని సౌత్ టైన్‌సైడ్‌లో ఉండే ఆడమ్ థ్వైటస్, ఆయన భార్య లిజ్, కుమార్తె రెండంతస్తుల భవనంలో నివాసం ఉంటున్నారు. విశాలమైన ఈ భవనం సముద్ర తీరానికి కూడా చాలా దగ్గరగా ఉంటుంది. గ్రేస్‌హౌస్‌ అనే స్వచ్ఛంద సంస్థలో పనిచేస్తున్న లీజ్.. మానసిక వైకల్యంతో బాధపడే చిన్నారులు తమ పనులు తామే చేసుకునేలా శిక్షణ ఇవ్వడం.. అటువంటి పిల్లలతో కుటుంబ సభ్యులు ఎలా ఉండాలి.. కొన్ని ప్రత్యేక ఆటలను రూపొందించి.. పిల్లలు వాటిలో పాల్గొనేలా చేయడం, ఇతర యాక్టీవిటీలు నిర్వహించడం వంటివి చేస్తుంటారు. ఈ క్రమంలో ఓ సారి ఆడమ్‌ తన భార్య లీజ్‌ కోసం గ్రేస్‌‌హౌస్‌ దగ్గరకు వెళ్లినప్పుడు వీల్‌ఛైర్‌తో నడవగల ఊయల గురించి ఆరా తీసి.. దాని ధర 13 వేల పౌండ్లు (దాదాపు రూ.13 లక్షలు) అని తెలిసి ఆశ్చర్యపోయాడు. తమ కుమార్తె ఎమిలీకి కూడా ఊయల అంటే చాలా ఇష్టమని గుర్తుచేసుకున్నాడు. తన కుమార్తెలాగే అంత ఖరీదైన ఊయల ఊగే అవకాశం లేకపోవడం అతడిని కలచి వేసింది. అంత డ‌బ్బు త‌మ ద‌గ్గ‌ర లేక‌పోవ‌డంతో.. ఎలాగైనా దానిని కొనిపెట్టాలని మనసులో బలంగా సంకల్పించుకున్నాడు. ఈ విషయాన్ని భార్యతో పంచుకోగా.. ఆమె కూడా భర్త ఆలోచనకు మద్దతు తెలిపింది. దీంతో తాము ఉంటున్న ఇంటినే అమ్మకానికి పెట్టి డబ్బులు సేకరించాలని నిర్ణయించారు. అమ్మ‌కం కోసం లాట‌రీ విధానాన్ని తీసుకొచ్చారు. మొత్తం 2 లక్షల లాటరీ టిక్కెట్లను స‌మ‌కూర్చి.. ఒక్కో టిక్కెట్ ధరను రూ.100గా నిర్ణయించారు. అంటే, తమ ఇంటిని రూ.100 విలువ చేసే లాటరీ టికెట్‌గా మార్చారు. క్రిస్‌మ‌స్ రోజు ల‌క్కీ డ్రా తీసి.. లాట‌రీ టికెట్ కొన్న‌ ఒక‌రికి విజేతగా ప్రకటించి ఆ ఇంటిని అందజేయ‌నున్నారు. అంటే.. రూ.100 టికెట్ కొంటే.. రూ.2 కోట్ల విలువైన భవనం విజేత సొంతమవుతుంది. చారిటీ కోసం కూడా నిధుల‌ను సేక‌రిస్తున్న ఈ దంపతులు.. మ‌రో రూ.50 ల‌క్ష‌ల‌ు సేక‌రించ‌డ‌మే లక్ష్యంగా పెట్టుకున్నారు. ఇప్ప‌టికే దాదాపు టికెట్లు అమ్ముడుపోయినట్టు తెలుస్తోంది.

from Latest News in Telugu | Telugu Breaking News | బ్రేకింగ్ న్యూస్ Telugu | Samayam Telugu https://ift.tt/2ZRdYgy