చైనాలో తీవ్రత కొనసాగుతోంది. సోమవారం మరో 71 మంది కోవిడ్ 19తో మృతిచెందగా, కొత్తగా 508 కేసులు నమోదయినట్టు చైనా జాతీయ ఆరోగ్య కమిషన్ వెల్లడించింది. వైరస్‌కు ప్రధాన కేంద్రమైన వుహాన్ నగరంలోనే 68 మంది మృత్యువాతపడ్డారు. దీంతో ప్రపంచవ్యాప్తంగా కరోనా మృతుల సంఖ్య 2,693కి చేరుకోగా, బాధితుల సంఖ్య 77,850 దాటింది. అటు దక్షిణ కొరియాలోనూ కొత్తగా మరో 60 మందికి కరోనా వైరస్ సోకినట్టు నిర్ధారణ అయ్యింది. ఇప్పటి వరకూ కరోనా కేసుల సంఖ్య మొత్తం 893కి చేరింది. ఉత్తర కొరియా నుంచి వచ్చే బెదిరింపులు, ముప్పును ఎదుర్కొడానికి దక్షిణ కొరియా దాదాపు 28,000 మంది అమెరికా సైనికులను తన భూభాగంలో భద్రత కోసం వినియోగిస్తోంది. వైరస్ వ్యాప్తితో తమ సైనికుల ఆరోగ్యం గురించి అమెరికా ఆందోళన వ్యక్తం చేస్తోంది. కరోనా వైరస్ తీవ్రతతో దక్షిణ కొరియా, అమెరికా సంయుక్తంగా నిర్వహించే కమాండ్ పోస్ట్ ట్రెయినింగ్‌ను వాయిదా వేశారు. మరోవైపు, యెకహోమా తీరంలో నిలిచిపోయిన డైమండ్ ప్రిన్సెస్ విహార నౌకలోని మరో ప్రయాణికుడు కరోనా వైరస్‌తో మృతిచెందినట్టు జపాన్ తెలిపింది. ఈ నౌకలో కరోనా వైరస్‌తో చనిపోయినవారి సంఖ్య నాలుగుకి చేరుకుంది. డైమండ్ ప్రిన్సెస్‌లో మృతిచెందిన ప్రయాణికుడి వయసు 80 ఏళ్లని జపాన్ మీడియా వెల్లడించింది. కాగా, నౌకలోని పరిస్థితి అదుపులోకి రాకపోవడం, యాజమాన్యం తీసుకుంటున్న చర్యలపై జపాన్ ఆగ్రహం వ్యక్తం చేసింది. జపాన్‌లో కరోనా వైరస్ కేసుల క్రమంగా పెరుగుతుండటంతో దీనిని ఎదుర్కొడానికి మంగళవారం తర్వాత కార్యాచరణ ప్రకటించనుంది. ఇటలీలోనూ 162 మందికి వైరస్ సోకినట్లు నిర్ధారణ అయ్యింది. చైనా పర్యాటకులపై విధించిన నిషేధాన్ని న్యూజిలాండ్‌ మరో వారం రోజులు పొడగించింది. ఎనిమిది రోజుల పాటు చైనా పర్యాటకులు దేశంలోకి రాకుండా ఆంక్షలు విధించినట్లు ఆ దేశ ప్రధాని జెసిండా వెల్లడించారు. ఇదిలా ఉండగా ఇరాన్‌లో కరోనా తీవ్రరూపం దాల్చుతున్న నేపథ్యంలో పాకిస్థాన్, టర్కీ, అర్మేనియాలు ఆ దేశంతో తమ సరిహద్దులను మూసివేశాయి. ఇరాన్‌లో కరోనా మరణాలు చోటుచేసుకోవడం, బాధితుల సంఖ్య పెరగడంతో ఈ నిర్ణయం తీసుకున్నాయి.
from Telugu News Live | Today News in Telugu | తాజా తెలుగు వార్తలు https://ift.tt/2vfPgXT
No comments:
Post a Comment