కిమ్ దూకుడు.. అమెరికాను కవ్విస్తూ రెండు క్రూయిజ్ క్షిపణి ప్రయోగాలు

క్షిపణి పరీక్షల పరంపర కొనసాగుతోంది. ఆ దేశం మంగళవారం మరో రెండు క్రూయిజ్‌ క్షిపణులను పరీక్షించింది. దీంతో ఈ ఏడాదిలో ఇప్పటి వరకు ఆ దేశం జరిపిన ఐదో పరీక్ష కావడం గమనార్హం. తాజా పరిణామాలపై దక్షిణ కొరియా, అమెరికా నిఘా అధికారులు విశ్లేషణ జరుపుతున్నారు. 1,500 కిలోమీటర్ల దూరంలోని లక్ష్యాలను ఛేదించగల క్రూయిజ్‌ క్షిపణిని ఉత్తర కొరియా గత సెప్టెంబరులో తొలిసారిగా పరీక్షించింది. తాజాగా, మళ్లీ ఆ క్షిపణిని పరీక్షించి ఉంటుందని భావిస్తున్నారు. కరోనా వైరస్ వ్యాప్తితో సరిహద్దులను మూసివేయడం, అమెరికా ఆంక్షలతో ఉత్తర కొరియా ఆర్థిక వ్యవస్థ మరింత దిగజారింది. ఈ నేపథ్యంలో అణ్వస్త్ర అంశంపై అమెరికాతో నిలిచిపోయిన చర్చలను పునఃప్రారంభించాలని ఆ దేశం భావిస్తోంది. ఈ విషయంలో బైడెన్‌ ప్రభుత్వంపై ఒత్తిడి పెంచేందుకు వరుస నిర్వహిస్తోందనే విశ్లేషణలు కొనసాగుతున్నాయి. అణ్వస్త్రాలు, అమెరికాను కూడా లక్ష్యంగా చేసుకోగల దీర్ఘశ్రేణి క్షిపణులను పరీక్షిస్తామని కూడా ఉత్తర కొరియా అధినేత ఇటీవలే హెచ్చరించింది. 2018లో అమెరికాతో దౌత్యం మొదలయ్యాక ఈ తరహా ఆయుధాల పరీక్షలను ఆ దేశం నిలిపివేసిన సంగతి తెలిసిందే. ఫిబ్రవరిలో చైనాలో శీతాకాల ఒలింపిక్స్‌ ముగిశాక మరిన్ని క్షిపణి పరీక్షలకు ఉత్తర కొరియా దిగే అవకాశం ఉందని నిపుణులు చెబుతున్నారు. ఈ నెలలోనే రెండు హైపర్‌సోనిక్ క్షిపణులు, రైలు నుంచి బాలిస్టిక్ క్షిపణిని ఉత్తర కొరియా ప్రయోగించింది. అయితే, 2017 తర్వాత ఖండాంతర బాలిస్టిక్ క్షిపణులు, అణ్వాయుధ క్షిపణులను ఆ దేశం ప్రయోగించలేదు. అమెరికాతో 2019లో చర్చలు అర్ధాంతరంగా నిలిచిపోవడంతో మళ్లీ వరుస ప్రయోగాలతో ప్రపంచాన్ని ఆందోళనకు గురిచేస్తోంది. ఉత్తర కొరియా వరుసగా క్షిపణి పరీక్షలు నిర్వహించేందుకు సాంకేతిక సాయం అందిస్తున్న ఐదు సంస్థలపై అమెరికా ఆంక్షలు విధించింది. ఆ దేశంపై కొత్త ఆంక్షలు అమలు చేయాలని ఐక్యరాజ్యసమితిని కూడా కోరతామని చెప్పింది. ఉత్తర కొరియా ఎటువంటి బాలిస్టిక్ సాంకేతిక పరిజ్ఞానాన్ని ఉపయోగించే ప్రయోగాలపై ఐరాస భద్రతా మండలి నిషేధం విధించింది. కానీ క్రూయిజ్ క్షిపణులపై కాదు. ఉత్తర కొరియా ఎగుమతులపై నిషేధాన్ని తొలగించాలని, శుద్ధి చేసిన చమురు దిగుమతుల పరిమితిని పెంచాలని చైనా, రష్యా ఇటీవల పిలుపునిచ్చాయి. మరోవైపు, సరిహద్దు సమస్యల పరిష్కార కోసం చర్చలకు తిరిగి రావాలని ఉత్తర కొరియాను దక్షిణ కొరియా ఆహ్వానించింది.

from Latest News in Telugu | Telugu Breaking News | బ్రేకింగ్ న్యూస్ Telugu | Samayam Telugu https://ift.tt/3rTTspt