కరోనా మహమ్మారితో పోరులో భాగంగా దేశ రాజధాని ఢిల్లీ ప్రజల కోసం పలు కీలక నిర్ణయాలు తీసుకున్నట్లు హోం మంత్రి తెలిపారు. కరోనా రోగులకు పడకల కొరత దృష్ట్యా రైల్వే కోచ్లను కేటాయిస్తున్నట్లు ఆయన తెలిపారు. ఢిల్లీకి 500 రైల్వే కోచ్లను కేంద్రం కేటాయిస్తుందని వెల్లడించారు. ఈ రైల్వే కోచ్ల ద్వారా 8 వేల పడకలు అందుబాటులోకి వస్తాయని చెప్పారు. ప్రైవేట్ ఆస్పత్రుల్లో కరోనా చికిత్సకు అవకాశం కల్పించే అంశంపై కమిటీ ఏర్పాటు చేసినట్లు ఆయన తెలిపారు. ఆరోగ్య శాఖ మంత్రి హర్షవర్ధన్తో కలిసి ఆదివారం (జూన్ 14) ఆయన ఢిల్లీలో కరోనా పరిస్థితులపై సమీక్షించారు. ఈ సమీక్షా సమావేశంలో ఢిల్లీ లెఫ్టినెంట్ గవర్నర్ అనిల్ బైజాల్, సీఎం అరవింద్ కేజ్రీవాల్ పాల్గొన్నారు. వచ్చే రెండు రోజుల్లో ఢిల్లీలో కొవిడ్ పరీక్షలు రెట్టింపు చేయాలని.. ఆరు రోజుల్లో మూడు రెట్లు చేయాలని ఢిల్లీ ప్రభుత్వాన్ని అమిత్ షా నిర్దేశించారు. కొవిడ్ రోగుల కోసం అన్ని సదుపాయాలతో రైల్వే కోచ్లు ఏర్పాటు చేసినట్లు ఆయన తెలిపారు. ఆక్సిజన్ సిలిండర్లు, వెంటిలేటర్లు అందుబాటులోకి తెచ్చేందుకు కేంద్రం సిద్ధంగా ఉందని అమిత్ షా తెలిపారు. పల్స్ ఆక్సీమీటర్లు సహా అవసరమైన అన్ని ఏర్పాట్లకు కేంద్రం సిద్ధంగా ఉందని స్పష్టం చేశారు. ఢిల్లీలో ప్రైవేట్ ఆస్పత్రుల్లో కొవిడ్ చికిత్స కోసం కమిటీ ఏర్పాటు చేసినట్లు అమిత్ షా తెలిపారు. డాక్టర్ పాల్ నేతృత్వంలో ఏర్పాటు చేసిన ఈ కమిటీ పలు అంశాలను అధ్యయనం చేస్తుందని చెప్పారు. ప్రైవేట్ ఆస్పత్రుల్లో తక్కువ ధరలకు కరోనా పరీక్షలు, చికిత్స అందించే అంశంపై ఈ కమిటీ అధ్యయనం చేస్తుందని ఆయన వెల్లడించారు. ప్రైవేట్ ఆస్పత్రుల్లో కరోనా రోగులకు 60 శాతం పడకల ఏర్పాటుపై అధ్యయనం చేస్తుందని తెలిపారు. ఆయా అంశాలపై అధ్యయనం చేసిన సోమవారం లోగా నివేదిక సమర్పిస్తుందని చెప్పారు. కొవిడ్ నివారణ కోసం కేంద్రంతో కలిసి పోరాడుతామని ఢిల్లీ సీఎం అరవింద్ కేజ్రీవాల్ తెలిపారు. కరోనా పరిస్థితులపై ఢిల్లీ ప్రభుత్వం, కేంద్రం మధ్య చర్చలు జరిగినట్లు ఆయన వెల్లడించారు. సమావేశంలో పలు కీలక నిర్ణయాలు తీసుకున్నట్లు తెలిపారు. కొవిడ్ రోగులకు చికిత్స, మృతదేహాల నిర్వహణ విషయంలో సుప్రీంకోర్టు కీలక ఆదేశాలు జారీ చేసిన నేపథ్యంలో ఈ సమీక్షా సమావేశానికి ప్రాధాన్యం సంతరించుకుంది. Also Read:
from Telugu News Live | Today News in Telugu | తాజా తెలుగు వార్తలు https://ift.tt/2C6VWuH
0 Comments