క్రూరమైన నేరాలకు పాల్పడ్డారంటూ… ఒకే రోజు 81 మందికి మరణ శిక్ష

ప్రభుత్వం ఉగ్రవాద సంబంధిత నేరాలకు పాల్పడిన 81 మందికి ఒకేసారి అమలు చేసింది. ఇందులో 73 మంది సౌదీ దేశస్థులు, ఏడుగురు యెమెన్లు, ఒక సిరియా దేశస్థుడు ఉన్నారు. ఈ మరణశిక్షల గురించి ప్రభుత్వ ఆధ్వర్యంలో నడిచే సౌదీ ప్రెస్ ఏజెన్సీ వెల్లడించింది. ఈ శిక్షపడిన వారంతా క్రూరమైన నేరాలకు పాల్పడినట్లు తేలిందని తెలియజేసింది. వీరిలో ఇస్లామిక్ స్టేట్ గ్రూప్, అల్ ఖైదా, యెమెన్ హుతీ తిరుగుబాటు దళాలు లేదా ఇతర ఉగ్రవాద సంస్థలతో సంబంధం ఉన్న దోషులు కూడా ఉన్నారని పేర్కొంది. మరణశిక్షకు గురైన వారందరిని సౌదీ కోర్టుల్లో విచారించారని, 13 మంది జడ్జ్‌ల పర్యవేక్షణలో ఒక్కో వ్యక్తికి మూడు వేర్వేరు దశల్లో విచారణ జరిగిందని సౌదీ ప్రెస్ ఏజెన్సీ తెలిపింది. "ఉగ్రవాదం, దేశానికి ముప్పు కలిగించే తీవ్రవాద సిద్ధాంతాలకు వ్యతిరేకంగా రాజ్యం కఠినమైన వైఖరిని కొనసాగిస్తుంది" అని వార్తా సంస్థ పేర్కొంది. అదే సమయంలో శిక్షా సమయంలో నిందితులకు ప్రభుత్వ పరంగా న్యాయపరమైన హక్కును అందించామని సౌదీ ప్రభుత్వం తెలియజేసింది. ప్రభుత్వ నిర్ణయంపై హక్కుల కార్యకర్తలు విమర్శలు గుప్పిస్తున్నారు. రికార్డు స్థాయిలో 81 మందికి మరణశిక్ష అమలు చేసిందని, గత ఏడాది మరణించిన మొత్తం సంఖ్యను ఇది మించిపోయిందని వారు అంటున్నారు. అయితే ఒకేసారి 81 మందికి మరణశిక్ష విధించడం సౌదీ అరేబియా దేశ చరిత్రలో తొలిసారి. గతంలో 1979, 80 మధ్యన మక్కా మసీదును స్వాధీనం చేసుకోవాలని ప్రయత్నించిన 63 మందిని శిరచ్ఛేదన చేసింది. సౌదీ ప్రభుత్వం 2016లో 47 మందిని, 2019లో 37 మందిని సామూహికంగా మరణశిక్ష విధించింది. ప్రపంచంలోనే అత్యధిక మరణ శిక్షలు విధించిన దేశంగా సౌదీ అరేబియాకు పేరు ఉంది. కాగా ప్రపంచవ్యాప్తంగా దాదాపు 50 దేశాలు మరణశిక్షను విధిస్తున్నాయి. 2020లో మొత్తం 483 మరణశిక్షల్లో 88 శాతం కేవలం నాలుగు దేశాల్లోనే జరిగాయి. ఇరాన్‌ 246, ఈజిప్ట్‌ 107, ఇరాక్‌ 45, ఆపై సౌదీ అరేబియా 27 మరణశిక్షలు విధించాయి. ఈ విషయాన్ని ఆమ్నెస్టీ ఇంటర్నేషనల్ మానవ హక్కుల సంస్థ తెలియజేసింది.

from Latest News in Telugu | Telugu Breaking News | బ్రేకింగ్ న్యూస్ Telugu | Samayam Telugu https://ift.tt/B4aeOPS