మరియూపోల్ అత్యంత దయనీయ పరిస్థితి..శ్మశానాలు దొరక్క సామూహిక అంత్యక్రియలు

ఉక్రెయిన్‌ నగరాలపై భీకర దాడులతో విరుచుకుపడుతున్న రష్యా.. సామాన్య పౌరులను కూడా వదిలిపెట్టడం లేదు. నివాస గృహాలపై క్షిపణులు, బాంబులతో దాడులకు పాల్పడుతోంది. రష్యా సైనిక చర్య మొదలుపెట్టిన రోజు నుంచే ఉక్రెయిన్ వ్యూహాత్మక రేపు నగరం మరియూపోల్‌పై విచక్షణరహితంగా షెల్ దాడులు చేస్తోంది. 19 రోజులుగా అక్కడ దయనీయ పరిస్థితులు నెలకొన్నాయి. వేలాది మంది అమాయక ప్రజలు ఈ దాడుల్లో ప్రాణాలు కోల్పోతున్నారు. ఇప్పటి వరకూ 2,100 మందికిపైగా మృతిచెందినట్టు నగర అధికారులు తెలిపారు. ‘‘రష్యా దాడుల్లో ఇప్పటి వరకూ 2,187 మంది ప్రాణాలు కోల్పోయారు’’ అని మరియూపోల్ నగర అధికారులు టెలిగ్రామ్‌లో పోస్ట్ చేశారు. దాదాపు 100 ఏరియల్ బాంబులు జారవిడిచారని తెలిపారు. గత బుధవారం మరియూపోల్ ప్రసూతి, చిన్న పిల్లల ఆస్పత్రిపై రష్యా దాడులను అంతర్జాతీయ సమాజం తీవ్రంగా ఖండించిన విషయం తెలిసిందే. నగరంలో శ్మశానాల్లో ఖాళీల్లేక స్థానిక ప్రభుత్వం మృతులకు సామూహిక అంత్యక్రియలు నిర్వహిస్తోంది. ఈ నగరంలో దాడులు మొదలైన 12 రోజుల్లో 1,500 మందికిపైగా మృతిచెందారని ఉక్రెయిన్‌ విదేశాంగమంత్రి దిమిత్రో కుబేలా వెల్లడించారు. దాడులు మొదలైన తొలి 9 రోజుల్లోనే 1,200 మంది మృత్యు ఒడికి చేరారు. సామూహిక అంత్యక్రియలకు సంబంధించిన ఓ ఫొటోను ఆయన ట్వీట్‌ చేశారు. ‘మరియూపోల్ ఇప్పుడు ఈ భూమి మీదనే అత్యంత దారుణమైన మానవతా విపత్తును ఎదుర్కొంటోంది.. 12 రోజుల్లో 1,582 మంది పౌరులు మరణించారు.. కొందరిని ఇలా సామూహికంగా పూడ్చిపెట్టాల్సి వస్తోంది.. ఉక్రెయిన్‌ను ఎదుర్కోలేని పుతిన్‌ ప్రభుత్వం.. నిరాయుధులపై బాంబులు వేస్తోంది.. సామాన్య పౌరులకు అందుతున్న మానవతా సాయాన్ని సైతం అడ్డుకుంటోంది’ అని ఆయన ఆవేదన చెందారు. రష్యా యుద్ధ నేరాలను ఆపేందుకు మాకు యుద్ధ విమానాలు కావాలని ప్రపంచ దేశాలను కోరారు. ప్రభుత్వం చేపడుతున్న ఈ సామూహిక అంత్యక్రియలకు కొన్ని స్వచ్ఛంద సంస్థలు సాయమందిస్తున్నాయి. ఈ సందర్భంగా సామాజిక కార్యకర్త వొలోడిమిర్‌ బైకోవ్‌స్కీ ఆవేదన వ్యక్తం చేశారు. ‘ఈ మారణకాండకు ముగింపు పలకాలి.. ఎవరిది తప్పు, ఎవరిది ఒప్పు అనే విషయం నాకు తెలియదు. దీన్ని ఎవరు మొదలుపెట్టారన్నది కూడా అనవసరం.. కానీ ఈ యుద్ధానికి ముగింపు పలకాలి’ అని పేర్కొన్నారు. రష్యా దాడులతో ఉక్రెయిన్‌లోని మరో రేవు నగరం అజోవ్‌ కూడా ఉక్కిరిబిక్కిరవుతోంది. అక్కడ మార్చి తొలి వారం నుంచి పరిస్థితి దయనీయంగా మారింది. తాగడానికి నీరు, ఆహారం లేక విపరీతమైన చలికి వణుకుతున్నారు. ‘‘అజోవ్ నగరంలో గత 12 రోజుల నుంచి అక్కడ విద్యుత్, నీళ్లు, ఆహారం సరఫరా ఆగిపోయింది.. మొబైల్ కమ్యూనికేషన్ వ్యవస్థ కూడా పూర్తిగా మూగబోయింది’’ అని స్థానిక అధికారులు తెలిపారు.

from Latest News in Telugu | Telugu Breaking News | బ్రేకింగ్ న్యూస్ Telugu | Samayam Telugu https://ift.tt/1ThSn7F