యూపీ గ్యాంగస్టర్ ఎన్‌కౌంటర్‌ ఘటనపై విచారణ.. ‘దిశ’ ఘటనను ప్రస్తావించిన సుప్రీం

కరుడగట్టిన నేరస్థుడు, ఉత్తర్‌ప్రదేశ్‌కు చెందిన గ్యాంగ్‌స్టర్‌ వికాస్‌ దూబే‌ను గత శుక్రవారం జరిగిన ఎన్‌కౌంటర్‌‌లో పోలీసులు హతమార్చిన విషయం తెలిసిందే. అరెస్ట్ చేయడానికి వెళ్లిన పోలీసులను అత్యంత క్రూరంగా తన అనుచరులతో దాడిచేసి, హత్యచేసిన ఘటన దేశవ్యాప్తంగా సంచనలం సృష్టించింది. తాజాగా, ఈ ఎన్‌కౌంటర్, హత్యలపై సీబీఐ లేదా ఎన్ఐఏలతో విచారణ చేపట్టాలని కోరుతూ పలు వ్యాజ్యాలు దాఖలయ్యాయి. ఈ పిటిషన్లపై మంగళవారం విచారించిన న్యాయస్థానం.. విచారణ కమిటీపై ఉత్తరప్రదేశ్ ప్రభుత్వానికి రెండు రోజుల గడువు విధించింది. విశ్రాంత న్యాయమూర్తి నేతృత్వంలో ఓ కమిటీని సుప్రీంకోర్టు నియమించే అవకాశం ఉంది. విచారణలో భాగంగా ఎటువంటి కమిటీ కావాలో చెప్పాలని కోరిన సుప్రీం.. సమాధానం చెప్పేందుకు గురువారం వరకు గడువు ఇచ్చింది. అనంతరం విచారణను జులై 20కి వాయిదా వేసింది. ఈ సందర్భంగా దిశ హత్యాచారం కేసులో నిందితుల ఎన్‌కౌంటర్ ఘటనను ప్రస్తావించింది. ‘తెలంగాణ కేసులో (వెటర్నరీ డాక్టర్ అత్యాచారం, హత్య కేసులో నిందితుల ఎన్‌కౌంటర్‌) చేసినట్టే చేస్తాం. ఎటువంటి కమిటీ కావాలో చెప్పండి’ అని చీఫ్ జస్టిస్‌ ఎస్‌ఏ బోబ్డే అన్నారు. దీనిపై స్పందించిన సొలిసిటర్ జనరల్ తుషార్ మెహతా... ఈ అంశంపై కాస్త సమయం కావాలని కోరారు. ప్రభుత్వ స్పందన తెలిపేందుకు దయచేసి కొంత సమయం ఇవ్వండి.. యూపీ ప్రభుత్వం నుంచి నిజానిజాలు కనుగొని మీ ముందు ఉంచుతాను’ అని తెలిపారు. ఓ హత్య కేసులో అరెస్టు చేయడానికి వెళ్లిన పోలీసులపై దాడికి పాల్పడి.. డీఎస్సీ, ముగ్గురు ఎస్ఐల సహా ఎనిమిది మందిని అత్యంత క్రూరంగా హత్యచేసిన తర్వాత దూబే పరారయ్యాడు. వారం రోజుల పాటు గాలించిన పోలీసులు.. ఈ క్రమంలో అతడి అనుచరులు ఐదుగుర్ని మట్టుపెట్టారు. చివరికి మధ్యప్రదేశ్‌లోని ఉజ్జయిని మహాకాళేశ్వర ఆలయంలో దుబే పట్టుబడ్డాడు. అక్కడ నుంచి యూపీలోని కాన్పూర్‌కు తరలిస్తుండగా తప్పించుకుని పారిపోయేందుకు ప్రయత్నించడంతో పోలీసులు అతడిని ఎన్‌కౌంటర్‌ చేశారు. హైదరాబాద్‌ ఔటర్‌ రింగ్‌రోడ్డు సమీపంలో గతేడాది నవంబరులో వెటర్నరీ డాక్టర్ దిశను అత్యంత క్రూరంగా అత్యాచారం చేసి హత్యచేసిన నిందితులను పోలీసులు అదే చోట ఎన్‌కౌంటర్‌ చేసిన సంగతి తెలిసిందే. కేసు రీకన్‌స్ట్రక్షన్ చేసేందుకు నలుగురు నిందితులను ఘటనాస్థలికి తీసుకెళ్లగా.. అక్కడ పోలీసులపై రాళ్లు, కర్రలతో దాడిచేసి, ఆయుధాలు లాక్కొనేందుకు ప్రయత్నించారు. దీంతో తప్పనిసరి పరిస్థితుల్లో ఆత్మరక్షణ కోసం పోలీసులు వారిపై కాల్పులు జరిపారు. ఈ ఘటనపై సుప్రీంకోర్టు విశ్రాంత న్యాయమూర్తి జస్టిస్ వీఎస్ సిర్పూర్‌కర్ నేతృత్వంలో విచారణ కమిటీ ఏర్పాటు చేసింది. దీనిపై నివేదికను సమర్పించనుండగా.. కరోనా వైరస్ కారణంగా ఆలస్యమయ్యింది.

from Telugu News Live | Today News in Telugu | తాజా తెలుగు వార్తలు https://ift.tt/3h4Vqwb